Rannsókn á meintu broti gegn þagnarskyldu
Ríkissaksóknari hefur í dag móttekið rannsóknargögn frá lögreglustjóranum á höfuðborgarsvæðinu vegna meints brots gegn þagnarskyldu, að því er varðar ætlaða miðlun persónuupplýsinga frá innanríkisráðuneytingu til fjölmiðla. Lögreglustjórinn á höfuðborgarsvæðinu hefur farið með rannsókn málsins samkvæmt fyrirmælum ríkissaksóknara. Fjölmiðlar hafa ítrekað fjallað um mál þetta.
Þegar rannsóknargögn berast til ríkissaksóknara frá lögreglu þá er málsmeðferð almennt með þeim hætti að ákærandi byrjar á því að yfirfara rannsóknargögn þar sem meðal annars er lagt mat á hvort rannsókn sé lokið eða hvort þörf sé á frekari rannsókn, sbr. 1. og 2. mgr. 57. gr. laga nr. 88/2008, um meðferð sakamála. Ef þörf er á frekari rannsókn þá er mál endursent til lögreglu með beiðni um frekari rannsókn. Ef ákærandi telur hins vegar að rannsókn máls sé lokið þá fer fram mat á skilyrðum saksóknar, það er að segja hvort ákærandi telji það sem fram hafi komið við rannsókn lögreglu sé nægilegt eða líklegt til sakfellis, sbr. 145. gr. laga um meðferð sakamála. Mat ákæranda tekur til sönnunar- og lagaatriða. Ef mál telst nægilegt eða líklegt til sakfellis þá er almennt ákært í máli. Ef hið gagnstæða á við þá er mál fellt niður.
Ríkissaksóknari hefur ekki tekið ákvörðun um framhald málsins. Tekið skal fram að málastaða embættisins er þung um þessar mundir og því er óvíst á þessu stigi hvenær afgreiðslu málsins lýkur hjá embættinu.
Ríkissaksóknari mun ekki tjá sig um málið við fjölmiðla á þessu stigi.